Zitto akasirishwa na Vodacom

Makamo wa Rais wa Jamhuri ya Muungano wa Tanzania, Dkt. Mohamed Gharib Bilal (wa tatu kushoto) akisindikizwa na Waziri wa Miundombinu wa Zanzibar, Hamad Masod Hamad (wa pili kulia) kutembelea eneo ambalo wahanga wa ajali ya meli wanakusanywa mjini Zanzibar

Jana asubuhi tarehe 10 Septemba 2011 Taifa liligubikwa na habari za kushtusha za maafa. Mwanzoni taarifa zilisambaa kwamba zaidi ya watu 2000 walikuwa kwenye Boti MV Spice Islander lililopinduka na kuzama mbele kidogo ya Nungwi likielekea kisiwani Pemba.

Habari hazikuwa za uhakika sana kwani vyombo vyetu vya habari na hasa Televeshini ya Taifa havikuwa vikitoa habari juu ya ajali hii. Habari zilisambaa kupitia mitandao ya intaneti na kufuatia uchu wa habari nilianzisha #ZanzibarBoatAccident katika mtandao wa twitter ili tuweze kufuatilia kwa karibu habari zote za ajali hii.

Habari zilisambaa kuwa Televisheni ya Taifa ilikuwa inaonyesha muziki wa Taarab na Baadaye vipindi vingine vya kawaida bila kutoa habari kwa Umma kuhusu msiba huu.

Watanzania waliokoa wakiwasiliana kupitia twitter na facebook walikuwa na hasira sana na kituo cha TBC1 kutoonyesha au kupasha habari juu ya ajali hii. Mpaka saa moja jioni kituo hiki cha Televisheni ya Taifa kilikuwa kinaonyesha watu wakicheza muziki wa Kongo, wanawake wakikatika viuno na hata ngoma za asili. ‘Hallo, washa TBC1 uone Televisheni yenu inachoonyesha’ yalikuwa ni maneno ya Mwakilishi Ismael Jussa Ladhu aliponipigia kuonyesha kusikitishwa kwake na kituo hiki.

Mpaka jioni tulikuwa tumepata taarifa kuwa Watanzania wenzetu 198 walikuwa wamepoteza maisha. 570 hivi walikuwa wameokolewa. Binafsi nilipotembelea Hospitali ya Mnazi Mmoja niliweza kumwona Binti aliyeitwa Leyla, akisoma darasa la Nne huko kisiwani Pemba. Leyla alipona, aliokolewa. Nilimwambia leyla atapona na kurudi Shuleni. Mpaka ninapoandika tumeambiwa kuwa Watanzania 240 wamegundulika kupoteza maisha na zaidi ya 600 wameokolewa.

Napenda kuwapongeza sana waokoaji wetu, wavuvi wa kijiji cha Nungwi na vijiji jirani, wamiliki wa mahoteli waliojitolea vifaa vyao kwenda kuokoa watu na wanajeshi wetu wa majeshi ya ulinzi na usalama kwa kazi hii kubwa ya kuokoa. Kwa kweli tumeokoa watu wengi kuliko ilivyotarajiwa. Serikali ya Mapinduzi Zanzibar imejitahidi sana, ilitulia na kuonyesha uongozi dhabiti katika juhudi za uokoaji.

Rais wa Jamhuri ya Muungano wa Tanzania akafuta ziara yake huko Canada, ziara iliyokuwa imeandaliwa muda mrefu na kwa gharama. Lakini Rais aliona ni vema kupata hasara kuliko kuwa nje ya Nchi kipindi hiki. Hakutaka hata kumtuma Makamu wa Rais au Waziri Mkuu. Alifuta. Akatangaza siku 3 za kuomboleza. Hata hivyo waandaaji wa Miss Tanzania waliona hasara kubwa kuahirisha shindano la Urembo usiku huo. Wangepata hasara! Hata wafadhili wao Kampuni ya simu za mkononi ya vodacom ambao miongoni mwa waliofariki wamo wateja wa vodacom, waliendelea na shindano hili.

Jumatatu, tarehe 12 Septemba 2011 ni siku ya khitma ya kuwaombea marehemu wetu. Nimeamua kutotumia simu ya ngu ya Voda kwa siku nzima, sina njia ya kuiadhibu Kampuni hii isipokuwa kugoma kutumia simu yao japo kwa siku moja kuonyesha kutoridhishwa kwangu na uamuzi wao wa kutojali msiba huu kwa Taifa.

Misiba huweka jamii pamoja. Msiba huu uliotokea Zanzibar ni jaribio kubwa kwa Umoja wa Taifa letu. Shirika la Utangazaji la Taifa limeshindwa jaribio hili la kudhihirisha Umoja wetu katika kipindi hiki. Nataraji wakubwa wa Shirika hili linaloendeshwa kwa kodi watawajibika au kuwajibishwa!

Jumla ya Majeruhi na marehemu sasa inafikia zaidi ya Abiria 800! Asubuhi ya jana 10 Septemba 2011 tuliambiwa na Serikali kwamba uwezo wa Boti la MV Spice Islander ilikuwa ni abiria 500 na wafanyakazi 12. Pia tumejulishwa kuwa boti hili lilikuwa la Mizigo na sio la Abiria. Natumai mara baada ya kumaliza maombolezo haya ya siku tatu Wakuu wa Mamlaka zinazohusika na usafiri wa Majini wa Serikali ya Mapinduzi Zanzibar watawajibika au kuwajibishwa. Mkuu wa Bandari ya Zanzibar Mustafa Aboud Jumbe na Waziri wa Miundombinu Hamad Masoud wanapaswa kufukuzwa kazi mara moja kama hawatawajibika wenyewe kwa kujiuzulu.

Kufukuzwa kwao kazi hakutarudisha ndugu zetu duniani bali itakuwa ni somo kuwa hatutarudia tena kufanya makosa yaliyoleteleza ajali kama hii.
Mwenyezimungu atupe subira wakati huu wa msiba mkubwa katika Taifa letu. Alaze roho za marehemu wetu mahala pema peponi na awape unafuu wa haraka majeruhi wetu.

Zitto Kabwe, Mb

(Nimeandika makala haya nikiwa katika Benchi la Hospitali ya Mnazi Mmoja hapa Zanzibar. Mniwie radhi kama kuna spelling mistakes kwani nilitaka hisia zangu ziwe as raw as possible -Zitto Zitto and not Zitto a politician).

Advertisements

5 responses to “Zitto akasirishwa na Vodacom

  1. Kwa wenzetu wa Tanganyika (kwa wale wenye jadi ya ukafiri) hii ni ujumbe wazi kwamba huu ni msiba wetu Wazanzibari.

    Kwa wenzetu wa Tanganyika (wanao jadi ya Kiislamu akiwemo Rais Kikwete) ni ujumbe rasmi kutoka kwao kwamba hili ni jambo lililowagusa na wapo pamoja nasi katika msiba huu. Ala kulli hali, wanazuoni wanatwambia kwamba kufa maji ni kufa shahidi. Kwa hivyo kwa upande mwengine tufarijike kwamba dugu zetu wamekufa shadhidi na makaazi yao ni peponi moja kwa moja. Tumshukuru Mola SWT kwa hilo.

    Kwa sisi wenyewe Wazanzibari kuna ujumbe gani unaotoka kwa Muumba Wetu SWT kwa tokeo hili kufanyika kwenye bahari ya Nungwi? Inasemekana Nungwi ina highest rate ya HIV positive kwa sababu ya utumwa-ngono (sex-slavery) uliyozagaa. Kuna khatua gani kutoka kwa serikali, wenyeji, na wanachi kwa jumla kuzuia upotofu huu?

    Mwenyezi awe pamoja nasi inshaaLlah.

  2. Angalau tunapata imani kidogo kuona Zitto umekerwa na tabia za jamaa zako. Kwa kweli haikufurahisha na niseme ilihuzunisha sana kuona baadhi ya wenzetu wa Tanzania bara hawakuguswa hata kidogo na msiba huu. Baadhi ya wengine walikua watoa pole kana kwamba wanzanzibari pekee ndo waliopatwa na hili tatizo peke yao kutofahamu kwamba sasa hivi kuna mchanganyiko mkubwa visiwani. Siwezi hata siku moja kusahau kauli ya mmoja ambae alitoa pole kwa wa Zanzibari lakini baada ya muda mfupi akarudi na kusema jamani huu msiba ni wa kwetu sote kumbe maana ake nimeona jina mmoja (nimelisahau) ambalo linaonekana wazi ni la kutoka musoma!! Nilishangaa na kustaajabu sana na ndipo nikaelewa kwamba kumbe mwanzoni pole zilikua kwetu kwa sababu wenzetu waliona msiba ni wa kwetu peke yetu!!
    Kwa kweli sio vizuri hata kidogo namna hii sisi kama ndugu wa damu kabisa!

  3. Mhe. Zitto umeonyesha ukomavu na hasa kwa kukasirishwa na TBC 1 lakini hii stesheni ni ya watanzania wote mimi nadhani
    ingekuwa ni sherehe tungeonyeshwa watz ila sasa duu, sijui nchi hii inaelekea wapi hasa sisi watz wa chini kiuchumi yaani
    huwezi amini tuli – tune stesheni za nje kuangalia kilichokuwa kinaendelea kwa wenzetu zenji.

    inakatisha tamaa any way ngoja tuishi kwa matumaini lakini nchi yetu jamani tunakoelekea.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s